Sauðfjárrækt fréttir

Þeir sem enn luma á sýnum sem á eftir að senda til greiningar (arfgerðargreiningar á príonpróteini sauðfjár) þyrftu að setja sig í sambandi við Eyþór (ee@rml.is) sem allra fyrst, en í byrjun næstu viku þurfa þessi sýni að vera klár til að fara erlendis. Þetta mun verða síðasta sendingin til greiningaraðilans í Þýskalandi að sinni.

Hér koma nokkrir punktar varðandi stöðu á sýnatökum og greiningum sýna í gegnum átaksverkefni RML í arfgerðargreiningum á príonpróteini sauðfjár:

Tvær vondar fréttir koma hér af sæðingastöðvahrútum. Annars vegar hefur það komið í ljós þegar sæðingahrúturinn Galli 20-875 frá Hesti var endurgreindur (þar sem skoða átti fleiri sæti á príongeninu en 136 og 154) að hann reynist arfblendinn fyrir áhættuarfgerð (V136). Því virðist vera að einhvers staðar í ferlinu, hvort sem það er við sýnatöku, merkingar eða greiningu – hafa orðið þessi mjög svo leiðu mistök og hann tekinn á sæðingastöð á röngum forsendum. Því má búast við að helmingur afkvæma Galla sem nú eru að fæðast vítt og breytt um landið beri áhættuarfgerð. Því er mikilvægt að þau afkvæmi Galla sem koma til álita næsta haust sem ásetningslömb séu arfgerðargreind þannig að áhættuarfgerðin sé ekki framræktuð.

Sauðfjárbændur eru spenntir fyrir niðurstöðum arfgerðagreininga en búið að greina 5.883 sýni af þeim 18.000 sem send hafa verið út til greiningar. Greiningar ganga heldur hægar en reiknað hafði verið með og er verið að skoða hvernig hraða megi þeirri vinnu.

Á Þernunesi hefur markvist verið farið í gegnum hjörðina í leit að fleiri gripum með ARR arfgerðina. Í gær bárust niðurstöður úr greiningum á 136 sýnum frá búinu. Í hópnum fundust 5 nýir ARR gripir, allt ær. Þá eru ARR kindurnar orðnar 14 í það heila á búinu. Á Stóru-Hámundarstöðum var strax farið í að taka fleiri sýni úr ættingum Austra 20-623 sem er fyrsti hrúturinn sem fundist hefur hér á landi með arfgerðina T137.

Þétt dagskrá er framundan á Fagfundi sauðfjárræktarinnar sem haldin er af Fagráði í sauðfjárrækt í samstarfi við RML, BÍ og Lbhí. Á morgun munu nokkrir erlendir sérfræðingar flytja erindi á netinu sem tengjast riðuveiki. Þar verður m.a. fjallað um fyrirliggjandi rannsóknir sem tengjast útrýmingu riðuveiki á Íslandi með ræktun þolnari stofna, sagt frá því hvernig mismunandi stofnar riðuveiki eru greindir og mælingar á þeirri vernd sem mismunandi arfgerðir veita. Þessi fundur hefst kl. 13:00 og fer eingöngu fram á netinu.

Fagráð í sauðfjárrækt í samstarfi við BÍ, LBHÍ og RML mun halda fræðslu og umræðufundi miðvikudaginn 6. apríl og fimmtudaginn 7. apríl. Fundur með erlendum sérfræðingum um riðurannsóknir á netinu 6. apríl. Þann 6. apríl verður eingöngu um netviðburð að ræða. Þar munu vísindamenn frá fjórum löndum fræða okkur um rannsóknir á riðuveiki. Þessir vísindamenn eru allir á einhvern hátt tengdir alþjóðlegri rannsókn er varðar útrýmingu á riðuveiki í íslensku sauðfé. Karólína í Hvammshlíð mun túlka mál þeirra á íslensku. Þessi fundur hefst kl. 13:00 og mun standa í rúmlega 2 tíma. Tengill á fundinn verður auglýstur síðar.

Átaksverkefnið í arfgerðargreiningum á príongeninu í kindum (riðuarfgerðargreiningum) er í fullum gangi. Búið er að úthluta 25.000 sýnahylkjum í gegnum verkefnið en til stendur að panta meira af hylkjum. Þeir sem sem vilja þá nýta sér að taka fleiri sýni í vor, annaðhvort úr fullorðnum kindum eða lömbum á sauðburði, þyrftu að tryggja sér sýnatökuefni í tíma. Næsta pöntun á sýnatökuefni verður gerð í byrjun apríl. Bændur þyrftu því að panta hér á vefnum í síðasta lagi 3. apríl til að tryggja sér sýnatökuefni í tíma, sem væri þá vonandi komið fyrir páska.

RML minnir sauðfjárbændur á að opnað hefur verið fyrir umsóknir um fjárfestingastuðning í sauðfjárrækt í samræmi við reglugerð um stuðning við sauðfjárrækt nr. 1253/2019, V. kafla. Umsóknum um fjárfestingastuðning vegna framkvæmda á árunum 2021-2022 skal skilað inn rafrænt á afurd.is eigi síðar en 15. mars. Markmið stuðningsins er að stuðla að bættum aðbúnaði sauðfjár og hagkvæmari búskaparháttum.