Fjárvís.is

Fjárvís er veflægt skýrsluhaldskerfi í sauðfjárrækt. Þar geta sauðfjárbændur skráð þær upplýsingar sem safnað er í skýrsluhaldi sauðfjár. Í kerfinu eru einnig ýmis yfirlit og skýrslur sem sýna niðurstöður um leið og búið er að skrá. Þar sem kerfið er veflægt eru allar niðurstöður miðaðar við rauntíma. Fjárvís er eitt af þeim verkfærum sem sauðfjárbóndi notar við ákvarðanatöku í búrekstri.

Á árinu 2016 var gerð breyting á Fjárvísi, þ.e.a.s. kerfið nýtist nú bæði fyrir skýrsluhald í sauðfjárrækt og geitfjárrækt. Þannig má segja að Fjárvís sé búgreinaskipt kerfi, annars vegar kerfi sauðfjárræktar og hins vegar kerfi geitfjárræktar og ber þá nafnið Heiðrún enda margt sameiginlegt í báðum þessum búgreinum.

Hægt er að panta áskrift að forritum og einnig er þjónusta við notendur forrita alla virka daga í síma 516 5000 eða í tölvupósti á tolvudeild(hjá)rml.is. Helstu leiðbeiningar við kerfið eru í notendahandbók sem er uppfærð reglulega ef einhverju valmyndum kerfisins er breytt. Ef þörf er á aðstoð við færslu skýrsluhalds geta ráðunautar RML aðstoðað. 

Í boði eru 3 mismunandi áskriftarleiðir að kerfinu Fjárvísi, hér er örstutt skilgreining á því hver munurinn á þeim er;

• Bóndi með hjarðbók - frír aðgangur
  • Er opinn fyrir skráningar til að uppfylla ákvæði um hjarðbókarhald í merkingarreglugerð.
  • Þar er hægt að skrá lyfjagjafir, selja gripi og staðfesta kaup. Eins er þar einföld burðarskráning þar sem afkvæmi er tengt við móður og hægt er að gera grein fyrir afdrifum gripa.
  • Þessi aðgangur er hins vegar ekki gildur skýrsluhaldsaðgangur og er þ.a.l. ekki hægt að skila þar inn gögnum sem veita rétt til greiðslna skv. reglugerð um stuðning við sauðfjárrækt.

• Bóndi í lögbundnu (lögb.) skýrsluhaldi - Ekki er veittur afsláttur tengdur ‚Félagsaðild BÍ‘ af þessum pakka – upplýsingar um áskriftarverð má finna seinast í verðskrá RML 
  • Hefur þá alla skráningarmöguleika sem þarf að hafa til að skýrsluhald uppfylli ákvæði reglugerðar um stuðning við sauðfjárrækt varðandi greiðslur frá hinu opinbera.
  • Hins vegar veitir þessi aðgangur ekki aðgang að neinum sameiginlegum skýrslum skýrsluhaldsins.

• Bóndi í almennu (alm.) skýrsluhaldi – áskriftarverð skv. verðskrá RML
  • Fullur aðgangur, þ.e. allir skráningarmöguleikar til staðar og eins aðgangur að öllum sameiginlegum skýrslum skýrsluhaldsins.
  • Gerir notanda kleift að taka gögn út á Excel-form til frekari persónulegrar úrvinnslu.