Nýtt kynbótamat

Nýtt kynbótamat var reiknað fyrir íslenska hestinn um helgina og var það birt nú í morgun í WorldFeng. Þegar Landsmót er haldið er nýtt kynbótamat iðulega reiknað að loknum vordómum á Íslandi til að hafa nýjar niðurstöður til að byggja röðun afkvæmahesta á. Alls bættust við frá vorinu 1.795 dómar frá sex löndum. Kynbótamatið byggir nú á tæplega 40.000 fullnaðardómum úr kynbótadómi og rúmlega 172.000 keppnisdómum. Það er því ljóst að árlega bætast við verðmætar upplýsingar sem styrkja grunn kynbótamatsins.

Hvað stóðhestana varðar eiga nú þátttökurétt í afkvæmasýningum á Landsmóti á Hólum fjórtán hestar; þrír til heiðursverðlauna fyrir afkvæmi og ellefu til fyrstu verðlauna fyrir afkvæmi. Þeir eru:

Heiðursverðlaun fyrir afkvæmi:

• Þráinn frá Flagbjarnarholti
• Adrían frá Garðshorni á Þelamörk
• Hreyfill frá Vorsabæ II

Fyrstu verðlaun fyrir afkvæmi:

• Hannibal frá Þúfum
• Skarpur frá Kýrholti
• Veigar frá Skipaskaga
• Pensill frá Hvolsvelli
• Útherji frá Blesastöðum 1A
• Safír frá Mosfellsbæ
• Kjuði frá Dýrfinnustöðum
• Rauðskeggur frá Kjarnholtum I
• Vökull frá Efri-Brú
• Dofri frá Sauðárkróki
• Vákur frá Vatnsenda

Ræktendum og eigendum hestanna er óskað innilega til hamingju með frábæran árangur og merkan áfanga. Haft verður samband við eigendur hestanna á næstu dögum til að skipuleggja afkvæmasýningar hestanna á Landsmóti.

Á föstudag var nýtt kynbótamat birt í WorldFeng en svo uppgötvaðist að keppnisdómar voru ekki rétt meðhöndlaðir í matinu. Þetta hafði áhrif á kynbótamat hrossa fyrir keppniseiginleikana en einnig aðra eiginleika. Því var ný kynbótamatskeyrsla sett í gang um helgina og rétt kynbótamat birt í WorldFeng í morgun.

/okg