Staða og gæðamat arfgerðagreininga

Góður gangur er í arfgerðagreiningum og búið að greina heldur fleiri sýni en á sama tíma í fyrra.

Í lok maí kom í ljós að einhver frávik höfðu orðið í greiningarferlinu í einni sendingu af niðurstöðum og í kjölfarið var sú sending af niðurstöðum tekin út og ákveðið að endurgreina þau sýni.

Í kjölfarið var í samráði við Matís ákveðið að taka upp markvisst gæðamat á hverri sendingu af niðurstöðum og er það nú gert við hvern innlestur svo hægt sé að grípa til aðgerða ef einhverjar vísbendingar koma fram um að eitthvað sé óvenjulegt og greina þau sýni aftur.

Vert er að benda á að hærra og hærra hlutfall foreldra gripa eru nú komnir með arfgerðagreiningu. Þar af leiðandi má búast við að hlutfall tilfella þar sem niðurstöður greininga passa ekki við foreldra, aukist miðað við fyrri ár þegar færri gripir höfðu greiningu sem hægt var að bera niðurstöður afkvæmanna saman við.

Þrátt fyrir að við sjáum nú hærri tíðni niðurstaðna sem standast ekki prófanir af ofangreindri ástæðu skal tekið fram að hlutfall greininga sem ekki standast villuprófun er enn fremur lágt. Með þessu reglubundna gæðamati sem nú hefur verið tekið upp getum við greint það ef við sjáum frávik frá því sem eðlilegt getur talist miðað við þróun á þessu frá því að greiningar hófust.

Unnið er að því að hægt verði með einföldum hætt að taka út úr Fjárvís niðurstöður sýna sem metið er að greina verði aftur. Um sýni sem ekki falla undir þá skilgreiningu gildir að ef ekki er hægt að skýra niðurstöðuna með mistökum í skráningum er tryggast að taka nýtt sýni úr gripnum.

Fyrirspurnir vegna riðuarfgerðargreininga er best að senda á netfangið dna@rml.is

Einnig viljum við góðfúslega beina því til sauðfjárbænda að vera búnir að forskrá sýnin í Fjárvís þegar þau fara í greiningu svo hægt sé að ná sem mestu öryggi á gæðamat á innlestrum.

/hh