Sauðfjárrækt fréttir

Við viljum vekja athygli á því að í einhverjum tilfellum hafa flögg lamba ekki skilað sér inn í prentaðar haustbækur. Það er þó vert að taka fram að allar niðurstöður frá Íslenskri Erfðagreiningu sem og Fjárvísgreiningar sem byggja á upplýsingum beggja foreldra koma fram í bókinni, en einhver misbrestur er á að flögg sem eru eingöngu byggð á arfgerð annars foreldris skili sér.

Riðuarfgerðargreiningar hafa gengið ákaflega vel í sumar hjá okkar samstarfsaðila, Íslenskri erfðagreiningu. Nú er nánast búið að greina öll sýni sem hafa borist í sumar og því að heita hreint borð í upphafi hausts. Framundan er næsta áhlaup en búast má við að talsvert komi inn af sýnum í haust þegar bændur fara að vinna í ásetningsvalinu. Frá því 1. maí hafa verið greind um 57.000 sýni. Miðað við niðurstöður sem liggja fyrir í Fjárvís má ljóst vera að býsna gott úrval er til af lambhrútum með verndandi og mögulega verndandi arfgerðir.

Fyrir 2 dögum síðan var sett í loftið ný gripaleit í Fjárvís. Fljótlega kom í ljós að nýja útgáfan virkaði ekki alveg nógu vel og ýmislegt sem vantaði í hana. Á meðan unnið er að því að laga og betrumbæta nýju gripaleitina hefur sú gamla verið sett í loftið á nýjan leik. Það verður þó aðeins tímabundið, eða að öllum líkindum fram í næstu viku. Notendur eru beðnir velvirðingar á þeim óþægindum sem þetta kann að hafa valdið.

Í gær fór í loftið uppfærsla á Fjárvís.is en í þetta skiptið kemur meðal annars ný gripaleit til notkunar. Gamla gripaleitin var með mjög mikið af upplýsingum og orðin ansi hæg. Því var tekið til í henni og upplýsingum fækkað sem sóttar eru í hvert skipti, sem hraðar leitinni töluvert.

Nú er aftur í boði tilboð á þokugensgreiningum hjá RML í samstarfi við Matís. Greining á þokusýni sem pantað verður nú í september og október mun kosta 5.600 kr. + vsk. (hefðbundið verð hjá Matís er 7.000 kr. + vsk). Hægt er að senda inn sýni til RML vegna þokugreininga. Einnig er hægt að vísa í sýni sem til eru í sýnasafni ef búið var að arfgerðargreina gripinn hjá Íslenskri erfðagreiningu fyrir 1. september 2025.

Nú hafa verið birt fyrstu drög að dagatölum lambadóma fyrir flest landsvæði. Þeir sem eiga eftir að panta eru hvattir til að gera það sem fyrst. Allar pantanir þurfa að fara í gegnum pöntunareyðublað á vef RML, einnig er hægt að hringja í síma 5165000 og fá aðstoð við að setja inn pöntun.

Minnt er á að samkvæmt upplýsingum á vef MAST þarf að vera búið að sækja um leyfi til að kaupa líflömb fyrir 1. september. Um er að ræða tvennskonar leyfi. Annars vegar hefðbundið kaupaleyfi lamba úr líflambasöluhólfum þar sem ekki þarf að tilgreina við hvaða bú er verslað. Hinsvegar er hægt að sækja um sérstakt leyfi til flutnings á lömbum með verndandi eða mögulega verndandi arfgerðir af öðrum svæðum en líflambasölusvæðum og þá gert ráð fyrir að bú séu tilgreind. Sótt er um leyfi í gegnum heimasíðu MAST.

Gróður er enn í fullum sumarskrúða og sannkölluð sumarblíða þessa dagana. Það styttist samt í göngur, réttir og önnur hauststörf. Sláturhúsin eru eflaust farin að kalla eftir sláturfjárloforðum og tímasetning á fjárragi farin að skýrast hjá mörgum bændum. Við viljum minna bændur á að panta lambadóma fyrr en seinna svo skipuleggja megi þessa vinnutörn með sem hagkvæmustum hætti fyrir alla. Eins og áður hefur komið fram njóta pantanir sem berast fyrir 20. ágúst forgangs hvað varðar óskatímasetningu hjá hverjum og einum. Talsvert er komið inn af pöntunum og því um að gera að draga það ekki lengi að panta tíma fyrir sínn lambahóp.

Í júlí er víða lítil viðvera á starfsstöðvum RML vegna sumarleyfa starfsfólks. Því getur verið að erindi fái ekki afgreiðslu fyrr en að þeim loknum í byrjun ágúst. Aðalnúmer RML 516-5000 er opið sem hér segir:  Mánudaga – fimmtudaga; kl 9-12 og 13-16. Föstudaga; kl 9-12. Eftir hádegi á föstudögum er lokað.

Byrjað verður að prenta haustbækur eftir verslunarmannahelgi. Eins og undanfari ár verður í bókunum uppfært kynbótamat sem byggir á vorgögnum. Kynbótamat verður uppfært reglulega og bækur þeirra búa sem hafa skilað vorbók sendar í prentun í kjölfarið. Síðasta keyrsla verður gerð strax eftir lokaskiladag vorgagna samkvæmt reglugerð sem er 20. ágúst.