Fréttir

Þeir bændur sem tóku lán í erlendri mynt fyrir hrun standa betur í dag heldur en þeir sem tóku verðtryggð lán í íslenskum krónum á sama tíma. Þetta segir Ólafur Þór Þórarinsson, ráðgjafi hjá Ráðgjafarmiðstöð landbúnaðarins og Búnaðarsambandi Suðurlands, í samtali við Morgunblaðið í dag. Þegar erlendu lánin hækkuðu gríðarmikið eftir hrun gátu bændur líkt og aðrir sem eru í rekstri gjaldfært hækkunina, eða gengismuninn. Hjá þeim betur stæðu komu gjöldin á móti hagnaði og hjá þeim verr stæðu voru búin rekin með tapi. Þessir bændur borguðu því minni eða engan tekjuskatt á þessum tíma. Þegar erlendu lánin voru síðan leiðrétt var leiðréttingin færð sem tekjur. Það veldur því að nú verða bændur sem eru réttu megin við strikið í rekstri sínum að borga tekjuskatt af leiðréttingunni.

Ríkislögreglustjóri í samráði við lögreglustjórann á Hvolsvelli ákvað í gær að aflétta óvissustigi vegna Heklu í kjölfar þess að Veðurstofa Íslands hefur ákveðið að breyta litakóða fyrir Heklu vegna flugumferðar úr gulu stigi yfir í grænt (eðlilegt ástand). Engir jarðskjálftar hafa mælst við Heklu síðan 23. mars, ekki hafa heldur mælst breytingar á gasi og hita við hátind Heklu.

Stjórnir Auðhumlu og Mjólkursamsölunnar hafa samþykkt hækkun á verði mjólkur umfram greiðslumark þannig að frá 1. apríl–30. júní 2013 verða greiddar 42 kr. á lítra sem svara til 2% af greiðslumarki hvers og eins og 36 kr. á lítra fyrir aðra umframmjólk.

Fóðurblandan hefur tilkynnt um lækkun á verði kjarnfóðurs um allt að 5%, mismunandi eftir tegundum. Að því er fram kemur í tilkynningu frá fyrirtækinu er ástæðan styrking íslensku krónunnar og lækkun á hráefnum til fóðurgerðar erlendis.

Rit LbhÍ nr. 44, Jarðræktarrannsóknir 2012, er komið út á rafrænu formi. Í ritinu eru allar helstu niðurstöður jarðræktarrannsókna við Landbúnaðarháskóla Íslands auk yfirlits um tíðarfar á landinu á árinu 2012. Þá eru birtar helstu veðurtölur á tilraunastöðvunum Korpu og Möðruvöllum. Greinum í ritinu er raðað eftir efnisflokkum. Fyrirferðamestu tilraunirnar á árinu 2012 voru tegunda- og yrkjaprófanir í grasi og smára og byggtilraunir voru einnig umfangsmiklar, þar sem prófaður var kynbótaefniviður byggs auk þess sem yrki voru prófuð.

Matvælastofnun hefur birt niðurstöður uppboðsmarkaðar með greiðslumark í mjólk þann 1. apríl 2013. Niðurstöðurnar eru þær að verð á greiðslumarki hefur hækkað um 15 kr/lítra frá því á síðasta markaði þann 1. nóvember 2012. Þetta er 4,9% hækkun á 6 mánuðum og á ársgrundvelli þá næstum því 10%. Alls bárust Matvælastofnun 68 tilboð um kaup eða sölu á greiðslumarki. Þannig buðu 10 aðilar 711.781 lítra til sölu en 57 aðilar óskuðu eftir 2.624.697 lítrum til kaups.

Afkvæmadómi nauta fæddra 2006 lauk í vetur og eru yfirlit, umsagnir og ýmsar tölulegar upplýsingar sem liggja til grundvallar nú komnar á vefinn hjá okkur. Nautaárgangurinn 2006 var fremur lítill árgangur en alls voru afkvæmarannsökuð 22 naut. Faðerni þessara nauta var nokkuð dreift þó tvö naut ættu þar flesta syni, Fontur 98027 sem átti 8 syni og Umbi 98036 sem átti 6 syni. Önnur naut sem áttu syni í þessum árgangi voru Stígur 97010 sem átti 3 syni, Glanni 98026 átti 2 og þeir Teinn 97001, Hersir 97033 og Þrasi 98052 áttu einn hver.

Enn er í gildi óvissustig vegna Heklu. Engir atburðir hafa átt sér stað, sem benda til að eldgos sé yfirvofandi en í samráði við Veðurstofu Íslands verður áfram fylgst með þróun mála. Að óbreyttu verður staðan endurmetin í næstu viku. Þetta kemur fram í tilkynningu frá almannavörnum. Veðurstofan og Almannavarnadeild Ríkislögreglustjóra standa vaktina yfir páskahátíðina og upplýsa almenning ef eitthvað nýtt kemur í ljós.

Lög um búfjárhald og lög um velferð dýra voru samþykkt á Alþingi í gær. Meðal nýmæla í lögum um velferð dýra er krafa um að hver sá sem hefur dýr í umsjá sinni búi yfir eða afli sér grunnþekkingar á þörfum og umönnun viðkomandi dýrategundar. Ekki er gerð sú krafa að um sé að ræða víðtæka þekkingu heldur einungis lágmarksþekkingu sem vænta má að geri viðkomandi aðila færan um að uppfylla lágmarkskröfur laganna varðandi umönnun dýra. Gert er ráð fyrir að þeir eigendur búfjár sem nú þegar hafa staðist búfjáreftirlit og eftirlit héraðsdýralækna teljist hafa nægjanlega grunnþekkingu.

Lífland hefur tilkynnt um lækkun á verði kjarnfóðurs. Hún nemur allt að 5% og er mismikil eftir tegundum. Þannig lækkar Góðnyt K-16, kjarnfóður með 16% próteini, um 2,5% svo dæmi sé tekið. Ástæða verðbreytinganna er lækkun á heimsmarkaðsverði hráefna til fóðurgerðar að því er fram kemur í tilkynningu frá fyrirtækinu.