Fréttir

Haustið 2012 voru unnar afkvæmarannsóknir á samtals 162 búum um allt land og komu þar til dóms rúmlega 1.700 afkvæmahópar. Allar helstu tölulegar niðurstöður ásamt umfjöllun um niðurstöður hverrar rannsóknar - og yfirlit um þá afkvæmahópa sem fram úr sköruðu - er nú að finna á vefnum.

Síðastliðinn fimmtudag var haldið á Stóra-Ármóti námskeið um hvernig mætti standa á sem hagkvæmastan hátt að nautakjötsframleiðslu hér á landi. Kennari var Þóroddur Sveinsson frá Landbúnaðarháskóla Íslands, en hann hefur meðal annars staðið fyrir rannsóknum á nautaeldi á Möðruvöllum í Hörgárdal.

Minnt er á næsta tilboðsmarkað með greiðslumark í mjólk sem fer fram 1. apríl n.k. Tilboðum skal skila til Matvælastofnunar í síðasta lagi þann 25. mars n.k., þ.e. á mánudaginn.

Fimmtudaginn 21. og föstudaginn 22. febrúar funduðu starfsmenn RML á Selfossi. Þetta var fyrsti fundurinn sem haldinn er á vegum RML þar sem allir starfsmenn fyrirtækisins hittast. Markmið fundarins var að stórum hluta að leiða alla starfsmenn saman, hittast sem ein heild.

Við vekjum athygli á því að þann 1. mars s.l. opnuðu Samtök afurðastöðva í mjólkuriðnaði (SAM) nýja og endurbætta vefsíðu. Á síðunni má finna margs konar fróðleik um íslenskan mjólkuriðnað, sem og aðrar áhugaverðar upplýsingar um mjólk og mjólkurvörur. Gamli vefur SAM hafði ekki verið uppfærður í nokkur ár og því er fengur að því að SAM opni nýjan vef með upplýsingum um íslenskan mjólkuriðnað.

Sláturhúsið á Hellu hefur tilkynnt um hækkun á verði nautgripakjöts til bænda frá og með 11. mars s.l. Ungnautakjöt hækkar um 5–20 kr/kg og K I U A, B og C um 5–15 kr/kg. Kjöt af öðrum kúm, kálfum og þjónustuliðir hækka ekki samkvæmt tilkynningu frá fyrirtækinu.

Öllum gripum sem reyndust hafa fengið smitandi barkabólgu (IBR) á Egilsstaðabúinu hefur verið slátrað. Í kjölfar þess voru tekin blóðsýni úr 178 nautgripum á búinu, eldri en 6 mánaða. Ekki fundust mótefni gegn sýkingunni í þeim gripum. Næst verða tekin blóðsýni eftir 5 mánuði á Egilsstöðum og Fljótsbakka en þangað fór ein smituð kýr frá Egilsstöðum. Ef ekki mælast mótefni gegn smitandi barkabólgu í sýnum má gera ráð fyrir að sýkingunni hafi verið útrýmt úr íslenska nautgripastofninum. Þangað til sú niðurstaða liggur fyrir eru þó hömlur á flutningi á dýrum frá þessum búum.

Útflutningur á heyi nam á síðasta ári tæpum 1.708 tonnum sem er 364 tonnum eða 27% meira en árið 2011. Til samanburðar nam útflutningur á heyi um 306 tonnum árið 2006 og hefur heyútflutningur því tæplega sexfaldast á sjö árum. Þetta kemur fram í Morgunblaðinu í dag. Í fyrra fóru 95% af útfluttu heyi til Færeyja eða 1.623 tonn, 59 tonn voru flutt til Hollands, 12 tonn til Frakklands og 14 tonn til Belgíu. Samkvæmt upplýsingum frá Matvælastofnun voru 103 tonn flutt til Danmerkur, en engar upplýsingar um það fundust hjá Hagstofunni. Líklegasta skýringin er talin vera sú að heyið hafi farið í gegnum Færeyjar til Danmerkur og komi því fram í gögnum um útflutt hey þangað.

Niðurstöður skýrsluhalds nautgriparæktarinnar hafa verið birtar á vef okkar. Niðurstöðurnar fyrir febrúar miðast við lok mánaðarins og upplýsingarnar voru sóttar í skýrsluhaldskerfið Huppu eins og staðan var á miðnætti þ. 10 mars. Þá höfðu 95% hinna 585 skýrsluhaldara skilað mjólkurskýrslum. Helstu niðurstöðurnar eru þær að 21.465,5 árskýr mjólkuðu 5.637 kg á síðustu 12 mánuðum og eru það nánast sömu afurðir og við síðasta uppgjör en þá reiknuðust afurðirnar 5.634 kg. Mesta meðalnyt árskúa reiknaðist á búi Guðmundar og Svanborgar í Miðdal í Kjós, sama búinu og undanfarna mánuði. Þar var meðalnyt árskúnna 7.939 kg.

Í gær kom út fyrsta tölublað búnaðarblaðsins Freyju árið 2013. Í blaðinu kennir ýmisa grasa að vanda. Fjallað er um nýliðun í nautgripa- og sauðfjárrækt og tveir landsþekktir veðurfræðingar gera illviðrinu 10. og 11. september 2012 góð skil. Katrín H. Andrésdóttir og Jóhannes Sveinbjörnsson taka síðan upp þráðinn þaðan sem frá var horfið í síðasta blaði, svo eitthvað sé nefnt.