Fréttir

Niðurstöður afurðaskýrslnanna í mjólkurframleiðslunni í mars hafa verið birtar á vef okkar. Þegar þær niðurstöður urðu til nokkru eftir hádegi þann 11. apríl, höfðu skýrslur borist frá 555 búum. Reiknuð meðalnyt 25.627,6 árskýr á þessum búum, var 6.283 kg á síðustu 12 mánuðum.

Í kvöld verður haldinn fundur á Hellu um kornrækt. Þar verður farið yfir ýmsar hliðar kornræktarinnar. Fundurinn hefst kl. 20:00 í sal Stracta Hotel.

Á fagþingi nautgriparæktarinnar sem fram fór á Hótel Selfossi í dag var afhent viðurkenning fyrir besta nautið fætt árið 2010 frá Nautastöð Bændasamtaka Íslands. Að þessu sinni hlaut kynbótanautið Úranus 10081 frá Hvanneyri þessa nafnbót. Guðný Helga Björnsdóttir, formaður fagráðs í nautgriparækt, afhenti Agli Gunnarssyni, bústjóra, og Hafþóri Finnbogasyni, fjósameistara, viðurkenninguna og við það tækifæri tók Margrét Gísladóttir, framkvæmdastjóri LK, meðfylgjandi mynd.

Fagþing nautgriparæktarinnar 2018 verður haldið í tengslum við aðalfund Landssambands kúabænda föstudaginn 6. apríl n.k. Þingið verður haldið á Hótel Selfossi og hefst kl. 13.00 en aðalfundur LK verður settur kl. 10.00 þann sama dag. Dagskrá aðalfundar LK og fagþingsins má sjá hér fyrir neðan, en bæði aðalfundurinn og fagþingið er að sjálfsögðu opið fyrir alla kúabændur landsins sem og annað áhugafólk um nautgriparækt. Vonandi sjá sem flestir sér fært að mæta.

Fagráð í hrossarækt boðar til funda um þróun og endurskoðun ræktunarmarkmiðsins og dómskalans í kynbótadómum. Hugmyndin er að kynna vinnu sem er í gangi þessa dagana við þetta verkefni og virkja fundarfólk til umræðu um málefnið. Sveinn Steinarsson formaður fagráðs og Þorvaldur Kristjánsson ábyrgðarmaður hrossaræktar kynna stöðuna og þær hugmyndir sem eru í farvatninu.

Alveg frá stofnun árið 2013 hefur RML tekið saman samanburðarlista yfir framboð og verð á sáðvöru frá öllum helstu söluaðilum. Fram til þessa hefur verið beðið með birtingu upplýsinganna þar til allir fræsalar hafa sent RML upplýsingarnar en að þessu sinni er listinn birtur strax með upplýsingum frá Sláturfélagi Suðurlands og Líflandi. Listinn verður svo uppfærður eftir því sem upplýsingar frá öðrum fræsölum berast.

Í kvöld verður haldinn fundur á Hvanneyri um kornrækt. Þar verður farið yfir ýmsar hliðar kornræktarinnar. Fundurinn hefst kl. 19:30 í Ásgarði.

Ráðgjafarmiðstöð landbúnaðarins hefur undanfarin ár boðið upp á þjónustu- og ráðgjafarpakka í jarðrækt undir heitinu Sprotinn. Viðbrögð bænda hafa verið góð og hefur þeim sem nýta sér þennan pakka fjölgað jafnt og þétt. Í fyrra tóku rúmlega 40 býli þátt. Lögð er áhersla á að hafa Sprotann í stöðugri þróun sem tekur mið af reynslu ráðunauta og ábendingum frá þeim bændum sem nýta sér pakkann.

Niðurstöður afurðaskýrslnanna í mjólkurframleiðslunni í febrúar hafa verið birtar á vef okkar. Þegar þær niðurstöður urðu til rétt fyrir hádegi þann 12. mars, höfðu skýrslur borist frá 553 búum. Reiknuð meðalnyt 25.451,1 árskýr á þessum búum, var 6.241 kg á síðustu 12 mánuðum.

Undanfarin fjögur ár hefur RML boðið bændum að taka þátt í ráðgjafarpakka sem kallaður er Sprotinn. Markmiðið með honum er að ná vel utan um alla jarðræktina á búinu með skráningum m.a. á því sem er ræktað, borið á og uppskorið og einnig eftir því sem þurfa þykir, sýnatöku á jarðvegi til að greina það sem hugsanlega má bæta. Ráðgjöfinni lýkur síðan alltaf á að unnin er áburðaráætlun þar sem gögn úr skýrsluhaldinu og niðurstöður hey- og jarðvegssýna eru höfð til stuðnings.