Fréttir

Nú er búið að stilla upp áætlun fyrir kynbótasýningar árið 2016 og er hún komin hér á vefinn undir Búfjárrækt/Hrossarækt/Kynbótasýningar. Ákveðið hefur verið að stilla ekki upp sýningum þar sem tvö dómaragengi eru að störfum en þörf hefur verið á því á suðvesturhorni landsins til að anna eftirspurn. Þess í stað verður boðið upp á sýningar á fleiri sýningarsvæðum á sama tíma.

Nú um áramótin fór Anna Margrét Jónsdóttir ráðunautur hjá RML í árs leyfi frá störfum. Hún hefur starfað hjá RML frá stofnun fyrirækisins en fyrir þann tíma starfaði hún sem ráðunautur hjá Búnaðarsambandi Húnaþings og Stranda. Verkefni hennar hjá RML tengdust aðallega sauðfjárrækt, jarðrækt og rekstraráætlunum. Starfsstöð hennar hefur verið á Blönduósi. Verkefni Önnu Margrétar færast því til annarra ráðunauta og bændum er bent á að hafa samband við skiptiborð RML í síma 516 5000. Ráðgjafarmiðstöð landbúnaðarins óskar Önnu Margréti velfarnaðar á öðrum starfsvettvangi.

Pétur Halldórsson verður við DNA-stroksýnatökur og örmerkingar í hesthúsahverfum á höfuðborgarsvæðinu (víðar ef óskað er) föstudaginn 8. janúar og svo mánaðarlega til vors.

Reglugerð um greiðslumark mjólkur og beinar greiðslur til bænda verðlagsárið 2016 var birt í Stjórnartíðindum þann 30. desember s.l. Greiðslumarkið lækkar um 4 milljónir lítra eða 2,86% milli ára, úr 140 milljónum lítra á nýliðnu ári í 136 milljónir lítra á því yfirstandandi. Heildarupphæð beingreiðslna er 5.521,8 milljónir kr., samanborið við 5.591,8 milljónir á síðasta ári. Þetta þýðir að meðalbeingreiðslur hækka í 40,60 kr. á lítra úr 39,94 kr á lítra.

Nú hafa allir stærslu áburðarsalar síðustu ára auglýst framboð og verð á áburði. Lækkun á áburðarverði er umtalsverð á milli ára eða oft á bilinu 7 og 15% en það er breytilegt á milli áburðarsala og áburðartegunda.

Skiptiborð RML verður opið alla virka daga frá kl. 8.00-12.00 og frá 12.30-16.00 nema aðfangadag og gamlársdag en þá verður lokað. Ekki verður þó föst viðvera á öllum skrifstofum RML virku dagana. Opnun starfstöðva og viðvera verður komin í eðlilegan farveg þann 4. janúar.

Í gær lauk sæðistöku hjá sauðfjársæðingarstöðvunum þetta árið. Alls voru sendir út rúmlega 48.000 sæðisskammtar nú í desember. Nýting þess ætti að verða talsvert betri en í fyrra og reikna má með að sæddar ær á landinu þetta árið verði rúmlega 30.000.

Samkvæmt staðfestingu frá Atvinnuvega og nýsköpunarráðuneyti frá 11. desember 2015 er Ráðgjafarmiðstöð landbúnaðarins (RML) heimilt að innheimta að hámarki kr. 6.500,- auk vsk fyrir vinnu við sérfræðistörf sem falla undir búnaðarlög, sbr. 7. gr. búnaðarlagasamnings dags. 28. september 2012 og 3. mgr. 3. gr. búnaðarlaga.

Í gær fóru í póst skýrslur til þeirra geitfjárræktenda sem skráðir voru með geitur á búfjárskýrslu haustið 2014. Þar er óskað eftir gögnum fyrir framleiðsluárið 2014 til 2015.

Haustuppgjör sauðfjár fyrir árið 2015 er nú aðgengilegt notendum á Fjárvís. Byrjað verður að prenta bækur eftir helgi fyrir þá sem það kjósa. Minnt er á að hægt er að nálgast vorbók sem PDF skjal með því að smella á „Skrá vorbók“ og velja „Prenta“ í titilrönd þar.