Fréttir

Námskeið fyrir nýja kynbótadómara í hrossarækt verður haldið á vegum Ráðgjafarmiðstöðvar landbúnaðarins (RML) í febrúar. Af því tilefni auglýsum við eftir áhugasömum einstaklingum. Þær kröfur sem gerðar eru um menntun eru BS-gráða í Búvísindum, Hestafræði eða Reiðmennsku og Reiðkennslu og að umsækjendur hafi lokið áfanga í kynbótadómum.

Fyrirhugað er að halda námskeið í bókhaldskerfinu dkBúbót á næstu vikum fáist næg þátttaka. Áður en staðsetning og fyrirkomulag er ákveðið viljum við kanna áhuga notenda, hvaða staðsetningar henti best og hvers konar fyrirkomulag henti. Áhugasamir eru því beðnir um að svara könnun sem er hér á heimasíðunni fyrir 26. janúar næstkomandi.

Samkvæmt staðfestingu frá Atvinnuvega- og nýsköpunarráðuneyti frá 21. nóvember 2014 er Ráðgjafarmiðstöð landbúnaðarins (RML) heimilt að innheimta að hámarki kr. 6000,- auk vsk fyrir vinnu við sérfræðistörf sem falla undir búnaðarlög, sbr. 7. gr. búnaðarlagasamnings dags. 28. september 2012 og 3. mgr. 3. gr. búnaðarlaga. Heimildin tók gildi þann 1. janúar 2015. Verðskrána má nálgast hér á vefnum undir flipanum starfsemi

Þessa dagana eru margir bændur að huga að áburðarkaupum fyrir vorið. Eins og áður leita bændur mikið ráða hjá ráðunautum RML varðandi val á áburðartegundum og magni svo kaupin geti sem best verið í takti við áburðarþarfir túnanna, uppskeruvæntingar og raunhæf fjárútgjöld.

Þann 1. janúar n.k taka gildi breytingar á lögum nr. 50/1988 um virðisaukaskatt. Vegna þessara breytinga þarf að uppfæra bókhaldskerfi, m.a. dkBúbót. Samkvæmt frétt sem birtist á heimasíðu Bændasamtaka Íslands www.bondi.is er nú unnið að uppfærslu á forritinu vegna þessara breytinga. Bændasamtök Íslands eru söluaðili kerfisins en ráðunautar RML veita viðskiptavinum ráðgjöf og aðstoð. Nánari upplýsingar verða birta á heimasíðu BÍ um leið og uppfærsla verður tilbúin.

Fyrir rúmri viku síðan lauk sæðistöku hjá sauðfjársæðingarstöðvunum þetta árið. Alls voru sendir út um 44.000 sæðisskammtar núna í desember. Þó er ljóst að nýting á útsendu sæði verður talsvert lakari í ár en undanfarin ár þar sem veðurfar var oft rysjótt. Flugi víða um land var oft aflýst og eins var víða ófærð landleiðina. Meira var um pantanir á sæði en undanfarin ár. Ætla má að sæddar ær á landinu þetta árið séu á bilinu 26 – 28 þúsund.

Stjórn og starfsfólk Ráðgjafarmiðstöðvar landbúnaðarins (RML) senda bændum og fjölskyldum þeirra sem og landsmönnum öllum sínar bestu óskir um gleðileg jól og farsæld á nýju ári með þökkum fyrir góð og ánægjuleg samskipti á árinu sem er að líða. Opnunartímar skrifstofa RML yfir hátíðarnar verða sem hér segir:

Þorvaldur Kristjánsson hefur verið ráðinn ábyrgðarmaður í hrossarækt hjá RML. Þorvaldur hefur lokið doktorsnámi í búvísindum með megináherslu á kynbótafræði og hrossarækt. Umfjöllunar- og rannsóknarefnið í doktorsritgerð hans var ganghæfni íslenskra hrossa – áhrif sköpulags og breytileika í DMRT3-erfðavísinum. Þorvaldur hefur mikla reynslu af dómum á kynbótahrossum, situr í fagráði í hrossarækt og hefur töluverða reynslu af alþjóðlegu samstarfi innan FEIF. Þorvaldur mun hefja störf strax á nýju ári og bjóðum við hjá RML nýjan liðsmann velkominn til starfa.

Í nýútkominni reglugerð um greiðslumark mjólkur og beinar greiðslur til bænda verðlagsárið 2015 er kveðið á um meiri aukningu á greiðslumarki en dæmi eru um áður. Greiðslumarkið eykst um 15 milljónir lítra eða 12% milli ára, úr 125 milljónum lítra á því ári sem senn er á enda í 140 milljónir lítra árið 2015. Heildarupphæð beingreiðslna er 5.591,8 milljónir kr., samanborið við 5.466 milljónir á þessu ári. Að raungildi er hún óbreytt milli ára. Þetta þýðir að meðalbeingreiðslur lækka í 39,94 kr. á lítra úr 43,73 kr á lítra.

Niðurstöður lambadóma voru betri í haust en áður hefur verið. Meðaltöl bakvöðvamælinga eru hærri en fyrr. Meðalhrútlambið í haust mældist með 29,4 mm bakvöðva sem er 0,2 mm meira en haustið 2012 en þá voru hrútlömbin jafnframt heldur þyngri. Meðal lambhrúturinn í haust stigaðist upp á 83,6 en á síðasta ári var nánast sami fjöldi hrúta með meðal stig upp á 83,2.