Fréttir

Við opnun tilboða um kaup og sölu á greiðslumarki mjólkur þann 1. apríl 2015 skv. reglugerð nr. 190/2011 með síðari breytingum, hefur komið fram jafnvægisverð á markaði krónur 150 kr. fyrir hvern lítra mjólkur.

Rétt er að minna á eftirfarandi: Í vor verður þess krafist að búið verði að taka DNA-sýni úr öllum hryssum sem mæta til kynbótadóms. Í fyrstu verður einungis gerð krafa um að búið sé að taka stroksýnið og að það hafi verið skráð í WF. Niðurstöður úr greiningu þurfa ekki að liggja fyrir.

Skýrsluhaldskerfið hefur nú verið uppfært og eru notendur hvattir til að skrá sig inn í kerfið og skoða það. Eftir páska verða kynningarfundur um notkun þess um allt land. Þeir verða auglýstir betur síðar og notendur hvattir til að fylgjast með hvenær fundur verður á þeirra svæði.

Við lok fagráðstefnu sauðfjárræktarinnar á föstudaginn voru veitt verðlaun sæðingastöðvanna fyrir besta lambaföðurinn starfsárið 2013-2014 og fyrir mesta alhliða kynbótahrútinn 2015. Faghópur sauðfjárræktar ákveður hvaða hrútar eru valdir ár hvert. Saumur 12-915 frá Ytri-Skógum fékk verðlaun sem besti lambafaðirinn og Steri 07-855 frá Árbæ fékk verðlaun sem mesti alhliða kynbótahrúturinn. Á meðfylgjandi mynd má sjá ræktendur þeirra með viðurkenninguna, Þórð Jónsson, Árbæ og Sigurð Sigurjónsson, Ytri-Skógum.

Á síðasta ári fengum við hjá RML góðar viðtökur hjá bændum við ráðgjafarpakka í jarðrækt sem við nefndum Sprotann og því ljóst að við munum halda því verkefni áfram. Við höfum gert smávægilegar breytingar á Sprotanum frá því í fyrra sem eru til þess fallnar að pakkinn nýtist bændum ennþá betur.

Í dag, föstudag fer fram fagráðstefna sauðfjárræktarinnar sem fagráð í sauðfjárrækt stendur fyrir í tengslum við aðalfund Landssambands sauðfjárbænda. Umfjöllunarefnið er beitarstjórnun og sníkjudýaravarnir á sauðfjárbúum.

Uppeldi kvígna er mjög misjafnt á milli búa og ljóst að víða má betur fara í því efni. Við getum ekki ætlast til þess að kýr skili bestum afurðum og séu við góða heilsu hafi þær ekki fengið gott uppeldi.

Óþarfi er að fjölyrða við bændur um mikilvægi þess að nýta búfjáráburðinn sem best en lykillinn að því er að þekkja vel efnainnihald hans. Í áburðaráætlanagerð styðjumst við yfirleitt við meðaltalstölur byggðar á rannsóknum en staðreyndin er sú að mikill munur getur verið á efnainnihaldi búfjáráburðar á milli búa og getur meðaltalið því gefið villandi niðurstöðu.

Vakin er athygli á að nýir listar yfir verð og framboð á sáðvöru og grasfræblöndum fyrir árið 2015 hafa nú verið birtir hér á heimasíðu RML. Á nýju listunum eru eins og áður upplýsingar um allt fræ og blöndur sem eru til sölu ásamt verði sem og upplýsingum sem liggja fyrir um viðkomandi yrki í nýjasta Nytjaplöntulista Landbúnaðarháskóla Íslands.

Á miðnætti 26. mars nk. verður skýrsluhaldskerfinu í sauðfjárrækt FJARVIS.IS lokað vegna flutnings á skýrsluhaldsgögnum yfir í nýtt skýrsluhaldskerfi. Ný útgáfa af FJARVIS.IS verður opnuð þriðjudaginn 31. mars en um er að ræða nýja kynslóð af skýrsluhaldskerfinu.