Fréttir

Skráningarfrestur á Miðsumarssýningu á Rangárbökkum vikuna 22. til 26. júlí hefur verið framlengdur til miðnættis föstudagsins 12. júlí. Nánari upplýsingar er hægt að fá í síma 516-5000 eða senda tölvupóst á netfangið rml@rml.is. Skráning fer fram í gegnum heimasíðu okkar á þessum hlekk:

Móttaka á pöntunum á lambadómum er nú hafin. Best er að bændur panti sjálfir í gegnum heimasíðu RML (sjá tengil á forsíðu) en einnig er hægt að hringja í 516-5000 og láta taka pöntunina niður. Eindregið er óskað eftir því að bændur panti fyrir 20. ágúst svo skipuleggja megi þessa vinnu með sem hagkvæmustum hætti. Ef ekki liggur fyrir í hvaða viku á að skoða lömbin upp úr miðjum ágúst er vakin athygli á því að hægt er að panta lambaskoðun án þess að panta ákveðna viku. Þeir bændur og skipuleggjendur verða þá í samráði með tímasetningu í framhaldinu og skoða hvaða möguleikar eru í stöðunni.

Vegna sumarleyfa starfsmanna og framkvæmda að Óseyri 2, þá verður ekki föst viðvera á starfsstöðinni á Akureyri frá 28. júní til 5. ágúst. Á meðan á þessu stendur biðjum við viðskiptavini okkar vinsamlegast að senda öll skýrsluhaldsgögn og DNA sýni til RML, Hvanneyrargötu 3, 311 Borgarnes. Ef upp koma mál sem ekki þola bið þá vinsamlega hringið í aðalnúmer RML 516-5000 eða sendið póst á netfangið rml@rml.is. Við biðjumst velvirðingar á þeim óþægindum sem þessi röskun getur valdið.

Nýtt kynbótamat var reiknað fyrir íslenska hestinn síðustu helgi og var það birt nú á mánudagsmorgni. Þegar Landsmót er haldið er nýtt kynbótamat iðulega reiknað til að hafa nýjar niðurstöður til að byggja röðun afkvæmahesta á. Alls bættust við frá vorinu 1.520 dómar frá sex löndum. Alls byggir kynbótamatið nú á 37.416 fullnaðardómum og því ljóst að árlega bætast við verðmætar upplýsingar sem styrkja grunn kynbótamatsins.

Nú er í gangi rannsókn þar sem verið er að kanna hvort gen eða einhverjir erfðaþættir valdi kálfadauða í íslenska kúastofninum. Mikilvægur liður í rannsókninni er að fá sýni úr kálfum sem sannanlega fæðast dauðir. Nokkur sýni hafa náðst í vetur en þörf er á fleiri og því er óskað eftir aðstoð bænda. Við biðlum því til ykkar með að taka sýni úr þeim kálfum sem fæðast dauðir og eru undan sæðinganautum. Sýnið er tekið þannig að klipptur er bútur af öðru eyra kálfsins og settur í poka sem merkja þarf með burðardegi og númeri móður. Sýnið er síðan geymt í frysti.

Þá er stórskemmtilegu dómavori að ljúka og að verða ljóst hvaða hross vinna sér inn þátttökurétt á Landsmóti. Á forsíðu WorldFengs má sjá „Sýningarskrá fyrir Landsmót 2024“ en þar kemur fram hvaða hross komast inn á Landsmót þegar yfirlitssýningum lýkur föstudaginn 21 júní. Ef fleiri en eitt hross eru jöfn í síðasta sæti inn á mótið (til dæmis fleiri en ein hryssa í 15. sæti í flokki 7 vetra og eldri hryssna) þá er þeim öllum heimil þátttaka á mótinu.

Röð hrossa á yfirlitssýningum morgundagsins á Rangárbökkum, Hólum og á Selfossi hafa allar verið birtar. Sýningarnar hefjast klukkan 08:00 í fyrramálið. 

Yfirlitssýning í Spretti fer fram fimmtudaginn 20. júní og hefst stundvíslega kl. 08.00

Opnað verður á skráningar á miðsumarssýningar mánudaginn 24 júní kl. 9:00. Skráning og greiðsla fer fram í gegnum heimasíðu RML www.rml.is en á forsíðunni er flýtihnappur sem skráð er í gegnum. Á forsíðu WorldFengs er einnig hægt að skrá hross til sýningar. Nánari leiðbeiningar varðandi skráningar er að finna á heimasíðu RML.

Vegna þess kaltjóns sem orðið hefur víða á Norður og Austurhelmingi landsins er bændum bent á að skoða vel það verklag sem Bjargráðasjóður óskar eftir að verði viðhaft við mat á tjóni. Bjargráðasjóður hefur samþykkt verklag sem verður viðhaft við afgreiðslu styrkumsókna vegna kaltjóna á Norður- og Austurlandi vorið 2024. Hlekk á verklagsreglurnar má finna hér. Á heimasíðu Bjargráðasjóðs hefur verið settur hlekkur inn á Bændatorgið, en umsóknir um styrk þurfa að fara þar í gegn.   Ráðunautar RML geta aðstoðað við gerð umsóknar  en bent skal á að samkvæmt reglum sjóðsins þá bera bændur þann kostnað sem getur orðið vegna umsóknar í sjóðinn.