Fréttir

Fóðurblandan hefur sent frá sér tilkynningu þess efnis að verð fóðurs hjá fyrirtækinu lækki í dag, 2. október 2013, vegna lækkunar á hráefnum erlendis frá. Jafnframt kemur fram að lækkunin verði mismikil eftir tegundum. Hins vegar kemur ekki fram hve mikil lækkunin er og fyrirtækið hefur ekki birt uppfærðan verðlista á heimasíðu sinni.

Lífland hefur ákveðið að lækka verð á kjarnfóðri frá og með 1. október að því er fram kemur í tilkynningu frá fyrirtækinu. Lækkunin er mismunandi eftir tegundum en mest nemur hún 5%. Ástæða verðbreytinganna er lækkun á heimsmarkaðsverði hráefna til fóðurgerðar vegna góðrar uppskeru í Evrópu, samkvæmt tilkynningu fyrirtækisins.

Ákveðið hefur verið að frumkvæði Samtaka loðdýrabænda á Íslandi og í samstarfi við RML að fara í aðbúnaðarverkefni með starfandi minkabændum. Markmið verkefnisins er að kanna aðbúnað á minkabúum og starfsvenjur minkabænda ásamt því að fá mat erlendra aðila á stöðunni eins og hún er nú.

Fyrirtæki í mjólkuriðnaði hafa sent frá sér tilkynningu þess efnis að öll mjólk verði keypt á fullu afurðastöðvaverði fram til áramóta. Að því er fram kemur í tilkynningunni hefur orðið veruleg söluaukning á smjöri, rjóma, ostum, drykkjarmjólk og fleiri afurðum. Mjólkursamsalan býst við að þessi þróun haldi áfram næstu vikur og fyrirtæki í mjólkuriðnaði hafa því ákveðið að kaupa alla framleiðslu bænda fullu afurðastöðvaverði frá októberbyrjun til áramóta. Samtök afurðastöðva í mjólkuriðnaði hafa einnig lagt til að greiðslumark næsta árs, sem er samanlagður framleiðsluréttur bænda fyrir innanlandsmarkað, verði aukið úr 116 milljónum lítra í 123 milljónir lítra.

Um síðustu áramót var reglum um greiðslur gæðastýringarálags breytt þannig að nú þarf að skila sýnum úr mjólk kúnna hið minnsta tvisvar á hverjum ársfjórðungi til Rannsóknarstofu SAM ef ætlunin er að halda eða öðlast rétt til að fá greitt gæðastýringarálag.

Samtök afurðastöðva í mjólkuriðnaði hafa gert um það tillögu til landbúnaðarráðherra að greiðslumark 2014 verði 123 milljónir lítra sem er aukning um 7 milljónir lítra frá greiðslumarki þessa árs. Gert er ráð fyrir að á tveggja ára tímabili frá 2012–2014 verði um 7,7 milljóna lítra aukning í mjólkursölu innanlands. Í fréttatilkynningu segir að þetta sé einsdæmi. Söluaukninguna má einkum rekja til fitumeiri afurða.

Dagana 17.-19. september tóku ráðunautar RML sem vinna við fóðuráætlanagerð, þátt í vinnufundi í Noregi. Árlega heldur NorFor vinnufund þar sem ráðunautum frá aðildarlöndunum, sem eru Danmörk, Svíþjóð, Noregur og Ísland, er boðið að taka þátt. Hluti fundarins fer fram með fyrirlestrum um faglegt efni, nýjungar og breytingar. Hinn helmingur tímans fer í umræður og hagnýta vinnu.

Fyrir nokkru síðan er búið að safna í einangrunargirðingar sæðingastöðvanna þeim hrútum sem koma nýir inn á sæðingastöð á grunni reynslu á heimabúi. Að loknum afkvæmarannsóknum í haust bætast svo nokkrir hrútar við. Af þeim hrútum sem voru í hrútaskrá síðasta árs eru 16 hrútar fallnir.

Í vikunni voru nokkrir Færeyingar í heimsókn hér á landi til að kynna sér sauðfjárrækt og framkvæmd kynbótastarfsins í sauðfjárræktinni hér á landi. Nokkrir þeirra fóru og smöluðu Oddstaðaafrétt með Lunddælingum á þriðjudaginn. Á miðvikudaginn fóru þeir ásamt Eyjólfi Ingva Bjarnasyni, sauðfjárræktarráðunaut að Eystri-Leirárgörðum í Hvalfjarðarsveit þar sem þeir fylgdust með lambamælingum ásamt því að farið var yfir með þeim hvað er verið að gera með dómum og mælingum á lömbum að hausti á Íslandi.

Sauðfjárbændur geta fylgst með skipulaginu með því að skoða dagatal ómskoðunar fyrir Suðurland, sem nú er komið inná heimasíðuna okkar.