Fréttir

Skattframtal einstaklinga var opnað á vefnum skattur.is föstudaginn 7. mars. Framtalsuppfærsla dkBúbótar er væntanleg um viku síðar og verður send notendum með skráð netföng með tölvupósti um leið og hún er tilbúin og jafnframt send í fjölföldun á geisladiskum og dreift með landpósti í kjölfarið.

Á vef Matvælastofnunar má lesa frétt um notkun dýralyfja fyrir búfé. Þar er fjallað um mikilvægi þess að rétt sé staðið að því að gefa dýrum lyf og þá fjallað sérstaklega um búfénað sem gefur af sér afurðir til manneldis. Vandamál tengd lyfjaþoli örvera eru sífellt að aukast en hægt er að minnka líkur á að lyfjaleifar finnist í dýraríkinu og draga úr líkum á fjölgun lyfjaþolinna örvera með því að sýna ábyrgð í lyfjanotkun.

Garðyrkjuráðunautur veitir alhliða og markvissa ráðgjöf í garðyrkju og ylrækt með það að markmiði að stuðla að aukinni framleiðni, hagkvæmni og eflingu þessarar mikilvægu greinar landbúnaðarins.

Á vef SAH afurða ehf. segir frá því að 14. febrúar síðastliðinn, hafi nautinu Jóni Mána frá Syðri-Löngumýri verið slátrað. Vóg hann 482,7 kg og er sennilega þyngsta naut sem lagt hefur verið inn hjá SAH afurðum ehf.

Þeir létu lítið fyrir sér fara gestirnir sem heimsóttu Búgarð á dögunum. Hundslegir lágu þeir í kassanum og létu lítið á sér bera.

Lausar eru til umsóknar tvær 70% stöður hjá RML. Um er að ræða afleysingar í eitt ár, frá 1. apríl 2014. Önnur staðan er á Suðurlandi með starfsstöð á Selfossi en hin á Norðurlandi með starfsstöð á Akureyri.

RML stóð fyrir örmerkinganámskeiði á Akureyri á dögunum. Námskeiðið var vel sótt og öðluðust 13 aðilar réttindi til að örmerkja hross eftir námskeiðið. Kíkið á meira til að sjá myndir frá námskeiðinu.

Stór hluti verkefna margra ráðunauta síðan rétt fyrir áramót hefur verið fólginn í því að aðstoða bændur við val á áburðartegundum og magni í samræmi við aðstæður á hverjum stað. Mikilvægt er að skilgreina vel mismunandi áburðarþarfir túna svo að búfjáráburður og tilbúinn áburður nýtist sem best.

Í næstu viku verða fundir í fundarröð Fagráðs um málefni hestamanna á Suðurlandi og í Reykjavík. Fundirnir verða haldnir á eftirtöldum stöðum og hefjast kl 20:00. Þriðjudaginn 25. febr. í Fákaseli (Ölfushöllinni) í Ölfusi. Miðvikudaginn 26. febr. í Félagsheimili Fáks í Víðidal.

Fagráð í nautgriparækt hefur að venju haft ýmis mál varðandi framkvæmd ræktunarstarfsins í nautgriparæktinni til umræðu. Ráðið hefur nú ákveðið að gera nokkrar breytingar sem eru til þessa fallnar að gera vinnu við kynbótastarfið hagkvæmari og skilvirkari. Þar ber fyrst að nefna val á nautsmæðrum en við skilgreiningu á þeim verður nú notast við aðaleinkunn í stað afurðaeinkunnar. Nú verður lágmark í afurðaeinkunn nautsmæðra miðað við 108, jafnframt verður gerð sú krafa á nautsmæður að þær hafi að lágmarki 100 í kynbótaeinkunn fyrir mjaltir og að lágmarki 90 í kynbótaeinkunn fyrir fitu.