Fréttir

Vert er að vekja athygli bænda á því að umsóknarfrestur til að sækja um jarðræktarstyrki rennur út 10. september eins og auglýst hefur verið í Bændablaðinu og á bondi.is. Hægt er að sækja um á eyðublaði og einnig er hægt að sækja um rafrænt á Bændatorginu. Sjá nánari upplýsingar um styrkina hér á bondi.is. Starfsmenn RML munu að sjálfsögðu aðstoða þá sem þess óska við umsóknir. Síminn okkar er 516-5000.

Bókin Sauðfjárrækt á Íslandi hefur nú verið gefin út. Það er Útgáfufyrirtækið Uppheimar sem gefur bókina út í samstarfi við Landbúnaðarháskóla Íslands. Bókin er komin í bókaverslanir um allt land en hefur verið í forsölu hjá Uppheimum um nokkurra vikna skeið. Hér er á ferðinni ómissandi bók fyrir alla sem hafa áhuga á að fræðast um íslenska sauðfjárrækt.

Nú eru komnar upplýsingar um fyrstu naut úr árgangi 2012 á vef nautaskráarinnar, www.nautaskra.net. Um er að ræða 16 naut á númerabilinu 12001 til og með 12040. Þetta eru synir Ófeigs 02016, Aðals 02039, Áss 02048, Gyllis 03007, Hegra 03014, Mána 03025, Tópasar 03027, Stássa 04024, Stíls 04041 og Ára 04043.

Nú stendur yfir samræmingarnámskeið RML fyrir þá starfsmenn sem koma til með að starfa við lambamælingar í haust. Á samræmingarnámskeiðinu eru verklagsreglur yfirfarnar og þar rifja reyndir starfsmenn upp verklagið auk þess sem nýir starfsmenn fá góða sýnikennslu og hlusta á umfjöllun um lambadóma og sauðfjárræktina.

Laust fyrir miðnætti þann 29. ágúst s.l. bar kýrin Lýsa 264 í Villingadal í Eyjafjarðarsveit tveimur kálfum. Það er reyndar ekki í frásögur færandi þótt kýr sé tvíkelfd, en snemma morguninn eftir komu aðrir tveir kálfar úr kúnni. Því miður voru allir kálfarnir dauðir, en fullskapaðir.

Fagráð í hrossarækt og Landbúnaðarháskóli Íslands boða til málþings um kynbótakerfið í hrossarækt föstudaginn 6. september kl. 13:00–18:00 í Ásgarði á Hvanneyri. Dagskráin samanstendur af nokkrum inngangserindum um ýmsar hliðar kerfisins en síðan taka við opnar umræður og hópavinna með þátttöku málþingsgesta.

Hrafnhildur Baldursdóttir er komin til baka úr fæðingarorlofi og mun starfa við fóðuráætlanir og önnur verkefni tengd fóðrun. Hrafnhildur hefur aðsetur á skrifstofunni á Austurvegi 1 á Selfossi en ein af stærri skrifstofum RML er staðsett þar. Þar er nú þegar staðsettur nokkur hópur starfsmanna RML sem er boðinn og búinn til ráðgjafar.

Sigríður Bjarnadóttir ráðunautur lét af störfum hjá RML nú í síðustu viku. Sigríður hóf störf sem héraðsráðunautur hjá Búgarði ráðgjafaþjónustu á Norðausturlandi árið 2005 þar sem hennar helstu verkefni vörðuðu nautgriparækt og fjármálaráðgjöf. Frá áramótum hefur hún starfað hjá RML sem ráðunautur í rekstrar- og fjármálaráðgjöf.

Víða á norðanverðu landinu hefur verið ákveðið að flýta göngum vegna yfirvofandi illviðris um komandi helgi. Þannig hefur þegar hefur verið tekin ákvörðun um að flýta göngum í allri Suður-Þingeyjarsýslu og Kelduhverfi. Í Húnaþingi vestra fara gangnamenn af stað í dag og reiknað er með að þar verði smalað á morgun og á fimmtudag. Í Austur-Húnavatnssýslu er stefnt á að smala víða á morgun og fimmtudag og sömu sögu er að segja úr Skagafirði og Eyjafirði.

Vegna tafa í prentsmiðju hefur prentun á haustbókum ekki gengið samkvæmt áætlun. Bækurnar eru sendar út til bænda um leið og þær koma úr prentun og eru þær að fara í póst þessa dagana. Biðjumst við velvirðingar á þessum töfum en vonumst til að megnið bókunum verði sent út á næstu dögum.