Fréttir

Landbúnaðarháskóli Íslands og RML hafa á undanförnum árum átt í góðu samstarfi um málefni búgreina og sérstakra faglegra þátta sem snerta landbúnað, landnýtingu, umhverfis- og loftslagsmál. Verkefnin eru á sviði ráðgjafar, kennslu, rannsókna og nýsköpunar. Starfsfólk RML kemur m.a. að kennslu hjá LbhÍ og faghópar LbhÍ og RML hittast á árlegum fundi til að leggja grunn að samstarfsverkefnum næsta árs. Slíkur ráðunautafundur var haldinn á fimmtudag og föstudag i síðustu viku með fjölda áhugaverðra erinda um verkefni sem eru í gangi. Á næsta starfsári er sérstaklega stefnt að aukinni samvinnu í kynbótum búfjár, bútækni, umhverfis- og loftslagsmálum.

Eins og kunnugt er var nautasæði kyngreint í fyrsta skipti á Íslandi í desember 2024. Þá var kyngreint sæði úr fimm nautum í tilraunaskyni þar sem hverri sæðistöku var skipt í annars vegar hefðbundið sæði og hins vegar kyngreint. Þetta sæði var notað um mest allt land án þess að frjótæknar eða bændur vissu um hvora tegundina var að ræða. Fyrsta sæðing fór fram 15. janúar s.l. og tilrauninni lauk þann 31. maí. Nú liggja fyrir allra fyrstu tölur um 56 daga ekki uppbeiðsli og eru þær birtar með fyrirvara þar sem uppgjöri er alls ekki lokið. Hins vegar styttist í að kyngreint sæði komi til notkunar og mikilvægt fyrir bændur að vita að hverju þeir ganga.

Niðurstöður skýrslna nautgriparæktarinnar fyrir síðastliðna 12 mánuði, nú að loknum júlí, má nú sjá á vef okkar. Niðurstöðurnar byggja á þeim skýrslum sem hafði verið skilað þegar komið var fram yfir nón þann 13. ágúst. Hér á eftir er farið stuttlega yfir nokkur atriði úr niðurstöðunum en mun meiri upplýsingar liggja fyrir í töflum þeim sem tengill er í neðst í þessari frétt. Þegar niðurstöðurnar voru reiknaðar hafði verið skilað mjólkurskýrslum frá 438 búum en uppgjör kjötframleiðslunnar nær nú til 114 búa þar sem framleitt var nautakjöt en ekki stunduð framleiðsla mjólkur til sölu. Reiknuð meðalnyt 24.322,3 árskúa á búunum 439 var 6.572 kg. eða 6.830 kg. OLM (af orkuleiðréttri mjólk)

Þessa dagana eru töðugjöld haldin víða um land eftir gott heyskaparár. Þá er heldur ekki eftir neinu að bíða með að ganga frá skráningum á jarðræktarskýrsluhaldinu í Jörð.is. Þó svo að uppskeran sé ef til vill ekki öll komin í hús eða plast þá er skynsamlegt að ganga frá skráningum á ræktun, áburðargjöf og a.m.k. fyrsta slætti sem fyrst, þannig að létt verk verði að klára skráningar tímanlega fyrir umsóknarfrest jarðræktarstyrkja og landgreiðslur sem er 1. október.

Síðsumarssýning kynbótahrossa fer fram á Hlíðarholtsvelli, Akureyri dagana 20.-22. ágúst n.k. Hér má sjá hollaröðun

Röðun hrossa á kynbótasýningunni á Rangárbökkum hefur verið birt. Alls eru 118 hross skráð. Dómar hefjast mánudaginn 18. ágúst kl. 8:00 en byrjað verður að mæla fyrstu hross kl. 7:50. Yfirlitssýning verður síðan á föstudeginum 22. ágúst.

Aðeins voru 9 hross skráð á síðsumarssýninguna á Selfossi og fellur sú sýning því niður, haft verður samband við eigendur þeirra hrossa. Skráningarfrestur á sýninguna á Hellu verður framlengdur til miðnættis á föstudaginn 8. ágúst

Hollaröðun á yfirlit á Rangárbökkum við Hellu föstudaginn 1. ágúst er komin á heimasíðuna okkar. Sýningin hefst kl. 8.00

Hollaröðun fyrir yfirlitssýningar á Akureyri og Rangárbökkum við Helllu föstudaginn 25. júlí eru nú komnar á heimasíðuna okkar. Sýningin á Akureyri hefst kl. 9.00 og sýningin á Rangárbökkum við Hellu hefst kl. 8:00

Í júlí er víða lítil viðvera á starfsstöðvum RML vegna sumarleyfa starfsfólks. Því getur verið að erindi fái ekki afgreiðslu fyrr en að þeim loknum í byrjun ágúst. Aðalnúmer RML 516-5000 er opið sem hér segir:  Mánudaga – fimmtudaga; kl 9-12 og 13-16. Föstudaga; kl 9-12. Eftir hádegi á föstudögum er lokað.