Fréttir

Nú hefur verið opnað á tvo nýja hluta í Huppu fyrir þá notendur sem greiða fyrir fullan aðgang að kerfinu. Þetta eru annars vegar Skýrslur bónda sem sjást nú sem nýr valmöguleiki undir Skýrslur og hins vegar Skjáborð sem er nú í valmyndinni fyrir neðan Skýrslur. Báðir þessir hlutar eru hugsaðir þannig að hver bóndi getur sett saman sína útgáfu eftir hentugleikum til að fá betri yfirsýn yfir sitt bú.

Ef lömb fæðast sem bera hugsanlega einkenni bógkreppu er áfram mikill akkur í því að fá úr þeim DNA sýni. Enn er í þróun erfðapróf fyrir bógkreppu og mikilvægur liður í að bæta það próf er að fá sýni úr lömbum sem örugglega bera þennan erfðagalla. Hvað á að gera ef fæðist vanskapað lamb og grunur er um að það sé vegna bógkreppu? Yfirleitt drepast þessi lömb í burði. Engu að síður er best að gefa þeim lambanúmer og taka úr þeim DNA sýni. Nota má sömu hylki og notuð eru vegna riðuarfgerðargreininga. DNA sýnið er skráð undir „aðrar arfgerðargreiningar“ og Matís skráð sem greiningaraðili.

Í dag þann 22. apríl tekur gildi ný verðskrá fyrir þjónustu RML. Á stjórnarfundi RML þann 11. apríl síðastliðinn, voru samþykktar breytingar á verðskrá RML.  Verðskráin er tvíþætt í þeim skilningi að ákveðinn hluta verðskrár getur stjórn breytt en annar hluti er háður samþykki atvinnuvegaráðuneytisins.

Vel var mætt á fagfund sauðfjárræktarinnar og á árshátíð sauðfjárbænda sem fram fór laugardaginn 12. apríl á Fosshóteli Húsavík. Báðir viðburðirnir heppnuðust afar vel og eiga heimamenn sérstakt hrós skilið fyrir góðar móttökur og þeirra þátt í undirbúningi. Að vanda voru flutt fjölbreytt erindi á fagfundinum sem fagráð í sauðfjárrækt stóð fyrir og neðst í þessari frétt er hlekkur á upptöku af fundinum.

Nú er kominn sá tími að huga þarf að sáðvörukaupum fyrir vorið. Ráðunautar RML hafa tekið saman framboð fræsala af sáðvöru líkt og undanfarin ár. Ýmis ný og gömul yrki er í boði en við áréttum mikilvægi þess að kynna sér vel hugsanlegan mun á yrkjum einstakra tegunda enda getur verið mikill munur á frammistöðu þeirra þó þau tilheyri sömu tegundinni. 

Niðurstöður skýrslna nautgriparæktarinnar fyrir síðustu 12 mánuði, við endaðan mars, að liðnu jafndægri á vori, hafa verið birtar á vef okkar. Niðurstöðurnar byggja á þeim skýrslum sem hafði verið skilað þegar komið var fram um hádegi þann 11. apríl. Hér á eftir er farið yfir nokkur atriði úr niðurstöðunum en rétt er að benda á að mun meiri upplýsingar er að finna í töflum þeim sem tengill er í neðst í fréttinni.

Út er komin skýrsla frá RML um rekstur og afkomuþróun sauðfjárbúa fyrir árin 2021-2023. Sú skýrsla er unnin út frá rekstrargögnum samtals 198 sauðfjárbúa af landinu öllu. Innlagt dilkakjöt þátttökubúanna var 28,7% af heildarframleiðslu dilkakjöts árið 2023. Það hlutfall, ásamt samanburði á gögnum frá fyrra ári, bendir til að gögnin gefi góða mynd af stöðu og þróun í greininni. Árið 2023 reiknast rekstrarniðurstaða þátttökubúa nokkurn veginn á núlli sem er í fyrsta skipti á verkefnistímanum sem spannar 6 ár.

Nú styttist óðfluga í kynbótasýningar vors og sumars ´25. Skynsamlegt fyrir ræktendur og þjálfara að huga að þeim aðgengiskröfum hrossa sem tilheyra dómsstörfum.

Út er komin skýrsla hjá RML um rekstur og afkomuþróun kúabúa fyrir árin 2021-2023. Sú skýrsla er unnin út frá rekstrargögnum 187-192 kúabúa af landinu öllu sem endurspeglar um 45-49% af heildarmjólkurinnleggi landsins, vaxandi eftir árum. Það hlutfall ásamt samanburði við gögn frá fyrri árum bendir til að gagnasafnið gefi góða mynd af stöðu og þróun í greininni.

Í gær var keyrð mjög stór uppfærsla á Fjárvís.is. Búið er að uppfæra bæði afdrifa- og atburðaskráningu og komin inn ný afdrifaskráning fyrir lömb sérstaklega. Einnig komu inn nýjar skráningar á vorgögnum, sem skiptast í Burðarskráningu annars vegar og Lambaskráningu hins vegar. Ný yfirlit eru svo komin inn fyrir allar þessar skráningar, þar sem hægt verður að breyta og/eða eyða tilheyrandi skráningum. Á fagþingi sauðfjárræktarinnar á Húsavík næstkomandi laugardag (12. apríl) verður fjallað betur um þessar skráningar og eru notendur Fjárvís.is hvattir til þess að fylgjast með fundinum.